ភ្នំពេញ ថ្ងៃទី១៣ ខែកមរា ឆ្នាំ ២០២៦ –ធនាគារ ហត្ថា ដែលជាសមាជិកនៃសម្ព័ន្ធហិរញ្ញវត្ថុ MUFG ដែលមានមូលដ្ឋាននៅប្រទេសជប៉ុន ទទួលបានវិញ្ញាបនបត្រកម្រិតអនុលោមភាពសារពើពន្ធប្រភេទ “មាស” ពីអគ្គនាយកដ្ឋានពន្ធដារសម្រាប់ឆ្នាំ ២០២៦និង ២០២៧។ ការទទួលស្គាល់នេះ គឺជាលទ្ធផលនៃការប្តេជ្ញាចិត្តរបស់ធនាគារចំពោះអនុលោមពន្ធភាពសារពើរពន្ធ តម្លាភាព និងការទូទាត់បង់ពន្ធតាមកាលកំណត់។
វិញ្ញាបនបត្រនេះបញ្ជាក់ពីការអនុវត្តត្រឹមត្រូវ និងតម្លាភាពខ្ពស់របស់ធនាគារ ហត្ថា ក្នុងការគោរពច្បាប់ពន្ធ និងការគ្រប់គ្រងគណនេយ្យប្រកបដោយស្តង់ដារ។ ជាមួយនឹងកម្រិតប្រភេទ “មាស” នេះ ធនាគារទទួលបានអត្ថប្រយោជន៍សំខាន់ៗ រួមមាន ការកាត់បន្ថយការត្រួតពិនិត្យពន្ធ ការដំណើរការសងពន្ធ(VAT) បានលឿនតាមចំនួនកំណត់ និងការទទួលស្គាល់ផ្លូវការចំពោះការកាន់កាប់កំណត់ត្រាគណនេយ្យបានយ៉ាងល្អ។
លោក មិន សុផា ប្រធាននាយកប្រតិបត្តិនៃធនាគារ ហត្ថា បានមានប្រសាសន៍ថា“ការទទួលបានវិញ្ញាបនបត្រកម្រិតអនុលោមភាពសារពើពន្ធប្រភេទ“មាស” គឺជាការបញ្ជាក់នៃការខិតខំប្រឹងប្រែងក្នុងការប្រកាន់ខ្ជាប់តាមបទប្បញ្ញត្តិស្តីពីពន្ធដារ សម្តែងឱ្យឃើញពីការប្តេជ្ញាចិត្តរបស់ធនាគារ ហត្ថា ក្នុងការគោរពបទប្បញ្ញត្តិ ស្តង់ដារគណនេយ្យ និងការគ្រប់គ្រងហិរញ្ញវត្ថុប្រកបដោយភាពទំនួលខុសត្រូវ ដែលកំណត់ដោយរាជរដ្ឋាភិបាល។ លោកបានបន្ថែមទៀតថា ”ពានរង្វាន់នេះគឺជាសក្ខីភាពមួយបង្ហាញពីការយកចិត្តទុកដាក់ និងភាពទុកចិត្តទៅកាន់ ម្ចាស់ភាគហ៊ុន អតិថិជន តាមរយៈការបង្ហាញពីសុចរិតភាពរបស់ក្រុមការងារទាំងមូលក្នុងការធានាបាននូវតម្លាភាព និងការបំពេញកាតព្វកិច្ចបង់ពន្ធ ដើម្បីគាំទ្រដល់ការអភិវឌ្ឍប្រទេសកម្ពុជាជាបន្តបន្ទាប់”។
វិញ្ញាបនបត្រនេះបញ្ជាក់ពីការប្តេជ្ញារបស់ធនាគារ ហត្ថា
ក្នុងការប្រកបអាជីវកម្មដោយគោរពតាមក្រមសីលធម៌
និងការបំពេញតួនាទីរបស់ខ្លួនជាស្ថាប័នហិរញ្ញវត្ថុដែលមានទំនួលខុសត្រូវនៅក្នុងប្រទេសកម្ពុជា
ដើម្បីបង្កើនទំនុកចិត្តពីអតិថិជន និងវិនិយោគគិនទាំងអស់។
អំពីធនាគារ ហត្ថា៖
ធនាគារ ហត្ថា ជាធនាគារពាណិជ្ជ ដែលមានវត្តមាននៅក្នុងព្រះរាជាណាចក្រកម្ពុជាអស់រយៈកាលជាង ៣០ឆ្នាំមកហើយ ដែលបានផ្តល់ជូនសេវាហិរញ្ញវត្ថុយ៉ាងទូលំទូលាយ ដល់អតិថិជនរបស់ខ្លួន ដែលរួមមានអតិថិជនជាលក្ខណៈបុគ្គល សហគ្រាសខ្នាតតូច និងមធ្យម (SME) ព្រមទាំងស្ថាប័នសាជីវកម្មធំៗជាច្រើនទៀត ។ ធនាគារ ហត្ថា ត្រូវបានទទួលស្គាល់ថាជាធនាគារពាណិជ្ជដ៏ឈានមុខគេមួយ ក្នុងការផ្តល់សេវាហិរញ្ញវត្ថុតាមបណ្ដាញសាខាដែលមានការតម្រែតម្រង់យ៉ាងទូលំទូលាយគ្របដណ្តប់ទូទាំងប្រទេស។
.png)
.png)