ធនាគារ ហត្ថា ម.ក បន្តគាំទ្រវិស័យអប់រំ និងសុខុមាលភាពកុមារ តាមរយៈការបរិច្ចាគដល់អង្គការរក្សាកុមារ

ភ្នំពេញ ថ្ងៃទី០៩ ខែឧសភា ឆ្នាំ២០២៦៖ ធនាគារ ហត្ថា​ ម.ក បានបញ្ជាក់ជាថ្មីនូវការប្តេជ្ញាចិត្តរបស់ខ្លួន ចំពោះការអភិវឌ្ឍសហគមន៍ និងវិស័យអប់រំ តាមរយៈការបរិច្ចាគថវិកាទៅកាន់អង្គការរក្សាកុមារ ដើម្បីគាំទ្រដល់សុខុមាលភាពកុមារនៅកម្ពុជា។ ពិធីប្រកាសនៃការប្រគល់ថវិកានេះ មានការចូលរួមពីលោក មិន សុផា ប្រធាននាយកប្រតិបត្តិធនាគារ ហត្ថា  និងលោកស្រី សុខ វណ្ណសិកា ប្រធានអង្គការរក្សាកុមារ ដែលបានបង្ហាញពីការប្តេជ្ញាចិត្តរួមគ្នាក្នុងការលើកកម្ពស់គុណភាពជីវិត និងអនាគតរបស់កុមារកម្ពុជា។

ការបរិច្ចាគថវិកាចំនួន ៤០,០០០,០០០ រៀលនេះ គឺជាលើកទី៣ ដែលធនាគារ ហត្ថា បានផ្តល់ការគាំទ្រដល់អង្គការរក្សាកុមារ ជាផ្នែកមួយនៃគម្រោងទំនួលខុសត្រូវសង្គម (CSR) របស់ធនាគារ ដោយមានគោលបំណងជំរុញ និងគាំទ្រការអប់រំ ការថែទាំសុខភាព និងការរស់នៅរបស់កុមារនៅក្នុងសហគមន៍កម្ពុជា។

លោក មិន សុផា ប្រធាននាយកប្រតិបត្តិធនាគារ ហត្ថា បានមានប្រសាសន៍ថា៖ «ការបរិច្ចាគនេះ មិនមែនត្រឹមតែជាការគាំទ្រផ្នែកហិរញ្ញវត្ថុប៉ុណ្ណោះទេ ប៉ុន្តែជាការប្តេជ្ញាចិត្តយ៉ាងមុតមាំរបស់ធនាគារ ហត្ថា ក្នុងការចូលរួមលើកកម្ពស់វិស័យអប់រំ សុខភាព និងសុខុមាលភាពរបស់កុមារកម្ពុជា ដើម្បីរួមចំណែកកសាងអនាគតដ៏ប្រសើរ និងមានឱកាសស្មើគ្នាសម្រាប់គ្រប់គ្នា»។ លោកបានបន្ថែមថា នេះគឺជាយុទ្ធសាស្រ្តមួយរបស់ធនាគារ ហត្ថា ក្នុងការចូលរួម​លើកម្ពស់ការងារសង្គម ជាពិសេសសុខភាពសង្គម និង​កុមារ។

លោកស្រី សុខ វណ្ណសិកា ប្រធានអង្គការរក្សាកុមារ បានថ្លែងអំណរគុណដល់ធនាគារ ហត្ថា ចំពោះការបន្តគាំទ្រជាប្រចាំ ដែលបានរួមចំណែកយ៉ាងសំខាន់ក្នុងការលើកកម្ពស់សុខភាព សេចក្តីថ្លៃថ្នូរ និងអនាគតរបស់កុមារកម្ពុជា និងជំរុញការគាំទ្រដល់កុមារគ្រប់ស្រទាប់វណ្ណះ ក្នុងគោលដៅសម្រេចឱ្យបាននូវវិបុលភាពរបស់កុមារ គ្រួសារ និងសង្គមជាតិ។

ធនាគារ ហត្ថា នៅតែប្តេជ្ញាចិត្តបន្តគាំទ្រគំនិតផ្តួចផ្តើមដែលជួយលើកកម្ពស់សហគមន៍ និងកុមារកម្ពុជា ដើម្បីរួមចំណែកកសាងសង្គមដែលមានចីរភាព និងអនាគតដ៏ភ្លឺស្វាង តាមរយៈការអប់រំ និងការគាំទ្រសង្គមជាបន្តបន្ទាប់។

ព័ត៌មានថ្មីៗ

ផលិតផលពេញនិយម

ការផ្តល់ជូនពិសេស