ធនាគារ ហត្ថា បានរៀបចំកិច្ចប្រជុំនាយក-នាយិកាសាខា ប្រចាំឆ្នាំ ២០២៥ ក្រោមប្រធានបទ៖ “ការផ្លាស់ប្តូរ ដើម្បីភាពជោគជ័យដ៏ប្រសើរ” ដើម្បីផ្ដល់គន្លឹះសំខាន់ៗ សម្រាប់ការផ្លាស់ប្តូរសម្រាប់ឆ្នាំថ្មី!

ភ្នំពេញ ថ្ងៃទី០៧ ខែកុម្ភៈ ឆ្នាំ២០២៥៖ ធនាគារ ហត្ថា ដែលជាក្រុមហ៊ុនបុត្រសម័្ពន្ធរបស់ ធនាគារ ក្រុងស្រ៊ី ដែលជាធនាគារពាណិជ្ជធំជាងគេលំដាប់ទី៥ នៅក្នុងប្រទេសថៃ និងជាសមាជិកនៃសម្ព័ន្ធហិរញ្ញវត្ថុអន្តរជាតិ MUFG បានរៀបចំកិច្ចប្រជុំនាយក-នាយិកាសាខា ប្រចាំឆ្នាំ ២០២៥ ក្រោមប្រធានបទ៖“ការផ្លាស់ប្តូរ ដើម្បីភាពជោគជ័យដ៏ប្រសើរ (Embracing Change Achieving Excellence)”។ កិច្ចប្រជុំនេះត្រូវបានរៀបចំឡើង នៅថ្ងៃទី ០៧ ខែកុម្ភៈ ឆ្នាំ២០២៥ នៅធនាគារ ហត្ថា ថៅវើ ដោយមានការអញ្ជើញចូលរួមពី លោក មិន សុផា ប្រធាននាយកប្រតិបត្តិនៃធនាគារ ហត្ថា ថ្នាក់ដឹកនាំជាន់ខ្ពស់ និងថ្នាក់គ្រប់គ្រង ព្រមទាំងលោកនាយក-នាយិកាសាខា របស់ធនាគារ ហត្ថា មកពីគ្រប់សាខាទូទាំងប្រទេស។ កិច្ចប្រជុំឆ្នាំនេះ ត្រូវបានប្រារព្ធឡើងក្នុងគោលបំណងបង្ហាញពីផែនការយុទ្ធសាស្ត្រព្រមទាំងគោលដៅសម្រាប់ឆ្នាំ ២០២៥ ដើម្បីទទួលបានគន្លឹះក្នុងការផ្លាស់ប្ដូរ ដែលមានប្រសិទ្ធភាពខ្ពស់ និងការយកចិត្តទុកដាក់កាន់តែខ្លាំងលើសេវាហិរញ្ញវត្ថុប្រកបដោយល្អប្រសើរ ជូនអតិថិជនរបស់ខ្លួន។

លោក មិន សុផា ប្រធាននាយកប្រតិបត្តិនៃធនាគារ ហត្ថា បានមានប្រសាសន៍ថា៖ “កិច្ចប្រជុំនៅថ្ងៃនេះ គឺជាវេទិកាដ៏មានសារៈសំខាន់ក្នុងការចែករំលែកនូវនៅផែនការយុត្តិសាស្រ្ត និងគន្លឹះក្នុងការផ្លាស់ប្ដូររបៀរបបការងារ ផ្នត់គំនិត អោយកាន់តែមានប្រសិទ្ធភាពខ្ពស់ ស្របជាមួយចំណេះជំនាញពង្រឹងកិច្ចសហការ និងកំណត់នូវការអនុវត្តផែនការយុទ្ធសាស្រ្ត ផ្តល់សេវាកម្មកាន់តែប្រសើរ ស្របទៅតាមតម្រូវការអតិថិជន។ បន្ថែមពីនោះទៀតការផ្លាស់ប្ដូរនេះ ពិតជាមានសារៈសំខាន់ណាស់សម្រាប់អាជីវកម្មរបស់យើង ដើម្បីធានាថារាល់សេវាកម្មហិរញ្ញវត្ថុ ដែលផ្ដល់ជូនដល់អតិថិជនពិតជាទទួលបាននៅការពេញចិត្តយ៉ាងកក់ក្ដៅ”។

ក្រោយពីបានទទួលនូវការចែករំលែកអំពីផែនការយុទ្ធសាស្ត្រ របៀបធ្វើការងារ និងការផ្លាស់ប្តូរផ្នត់គំនិត ជាមួយចំណេះជំនាញ និងបទពិសោធន៍ផ្សេងៗតាមរយៈការធ្វើបទបង្ហាញពីគណៈគ្រប់គ្រង បានធ្វើឱ្យអ្នកចូលរួមទាំងអស់យល់ដឹងអំពីទិសដៅនានា ហើយថែមទាំងជួយពង្រឹងសមត្ថភាព និងការចងសម្ពន្ធភាពក្នុងក្រុមការងារដែល អាចអភិវឌ្ឍន៍បន្ថែមនាពេលអនាគត ឆ្ពោះទៅកាន់ភាពរឹងមាំ វឌ្ឍនភាព និងភាពជោគជ័យ។

ទាញយកកម្មវិធីទូរសព្ទឥឡូវនេះ