ធនាគារ ហត្ថា រៀបចំកិច្ចប្រជុំប្រធានប្រតិបត្តិការសាខាប្រចាំឆ្នាំ ក្រោមប្រធានបទ «ការផ្លាស់ប្តូរ ដើម្បីភាពជោគជ័យដ័ប្រសើរ »ដោយផ្តោតលើការផ្លាស់ប្តូរដើម្បីភាពរឹងមាំទាំងអស់គ្នាលើឧត្តមភាពសេវាកម្មអតិថិជន

ភ្នំពេញ ថ្ងៃទី១៥ ខែកុម្ភៈ ឆ្នាំ២០២៥៖ ធនាគារ ហត្ថា ដែលជាសមាជិកនៃសម្ព័ន្ធហិរញ្ញវត្ថុអន្តរជាតិ MUFG បានរៀបចំកិច្ចប្រជុំប្រធានប្រតិបត្តិការសាខាប្រចាំឆ្នាំ ក្រោមប្រធាន «ការផ្លាស់ប្តូរ ដើម្បីភាពជោគជ័យដ័ប្រសើរ (Embracing Change Achieving Excellence)» កិច្ចប្រជុំនេះត្រូវបានរៀបចំឡើងថ្ងៃសៅរ៍ ទី១៥ ខែកុម្ភៈ ឆ្នាំ២០២៥ នៅ ធនាគារ ហត្ថា ថៅវើ ដោយមានការអញ្ជើញចូលរួមពី លោក មិន សុផា ប្រធាននាយកប្រតិបត្តិនៃធនាគារ ហត្ថា ថ្នាក់ដឹកនាំជាន់ខ្ពស់ និងថ្នាក់គ្រប់គ្រង ព្រមទាំងប្រធានប្រតិបត្តិការសាខា របស់ធនាគារ ហត្ថា មកពីគ្រប់សាខាទូទាំងប្រទេសជាង ២៥៥នាក់។

គោលបំណងនៃកិច្ចប្រជុំឆ្នាំនេះ បង្ហាញពី ផែនការយុទ្ធសាស្ត្រព្រមទាំងគោលដៅសម្រាប់ឆ្នាំ ២០២៥ និងគន្លឹះក្នុងការផ្លាស់ប្ដូរប្រកបដោយប្រសិទ្ធភាពខ្ពស់ ជាមួយការចែករំលែកនូវចំណេះជំនាញផ្សេងៗ ព្រមទាំងចំណុចសំខាន់គឺ ការពង្រឹងកិច្ចសហការ លើសេវាហិរញ្ញវត្ថុអោយកាន់តែប្រសើរជូនអតិថិជនរបស់ខ្លួន។

លោក មិន សុផា ប្រធាននាយកប្រតិបត្តិនៃធនាគារ ហត្ថា បានមានប្រសាសន៍ថា៖ “កិច្ចប្រជុំនៅថ្ងៃនេះ ដើរតួនាទីជាវេទិកាដ៏មានសារៈសំខាន់ក្នុងការចែករំលែកនូវនៅផែនការយុត្តិសាស្រ្ត និងគន្លឹះក្នុងការផ្លាស់ប្ដូររបៀរបបការងារ ផ្នត់គំនិត អោយកាន់តែមានប្រសិទ្ធភាពខ្ពស់ ស្របជាមួយចំណេះជំនាញផ្សេងៗ ដែលបានចែករំលែកក្នុងកិច្ចប្រជុំនេះ ដើម្បីផ្តល់សេវាកម្ម កាន់តែប្រសើរ ស្របទៅតាមតម្រូវការអតិថិជនផងដែរ។” លោក មិន សុផា  បានមានប្រសាសន៍បន្ថែមថា៖ “ដើម្បីសម្រេចឱ្យបាននូវឧត្តមភាពសេវាកម្មអតិថិជនឆ្ពោះទៅកាន់ភាពរីកចម្រើន និងភាពជោគជ័យនាពេលអនាគតទាំងអស់គ្នា ពិតជាមានភាពចាំបាច់យ៉ាងខ្លាំងក្នុងការផ្តល់សេវាកម្មប្រកបដោយឧត្តមភាព តម្លាភាព និងមានទំនួលខុសត្រូវខ្ពស់បំផុត ជាមួយការយកចិត្តទុកដាក់ និងអាកប្បកិរិយារួសរាយរាក់ទាក់ មានលក្ខណៈគុណសម្បតិ្តគ្រប់គ្រាន់ និងវិជ្ជាជីវៈខ្ពស់ គឺជាអ្វីដែលយើងត្រូវតែសម្រេចឱ្យខាងតែបាន ដើម្បីធានានូវស្នាមញញឹម ការពេញចិត្តខ្ពស់ចំពោះសេវាកម្មហិរញ្ញវត្ថុដ៏សម្បូរបែបរបស់ធនាគារ ហត្ថា។

ក្រោយពីបានទទួលនូវការចែករំលែកអំពីផែនការយុទ្ធសាស្ត្ររបៀបធ្វើការងារ និងការផ្លាស់ប្តូរផ្នត់គំនិត ជាមួយចំណេះជំនាញ និងបទពិសោធន៍ផ្សេងៗតាមរយៈការធ្វើបទបង្ហាញពីគណៈគ្រប់គ្រងបានធ្វើឱ្យអ្នកចូលរួមទាំងអស់យល់ដឹងអំពីទិសដៅនានាហើយថែមទាំងជួយពង្រឹងសមត្ថភាព និងការចងសម្ពន្ធភាពក្នុងក្រុមការងារដែល ជាពិសេសសម្រាប់ប្រធានប្រតិបត្តិការសាខា ក្នុងការបំពេញការងារប្រចាំថ្ងៃប្រកបដោយទំនុកចិត្តខ្ពស់ សុទិដ្ឋិនិយម និងការប្តេជ្ញាចិត្តកាន់តែរឹងមាំ ឆ្ពោះទៅរកវឌ្ឍនភាព និងភាពជោគជ័យ នាពេលខាងមុខ។

ទាញយកកម្មវិធីទូរសព្ទឥឡូវនេះ