សូមស្វាគមន៍មកកាន់ ធនាគារ
ហត្ថា ម.ក!
ក្នុងនាមជាប្រធានអគ្គនាយកស្តីទីនៃធនាគារ
ហត្ថា ខ្ញុំបាទសូមថ្លែងអំណរគុណយ៉ាងជ្រាលជ្រៅដល់អតិថិជនដ៏មានតម្លៃ បុគ្គលិកទាំងអស់សម្រាប់ការខិតខំប្រឹងប្រែងបំពេញការងារអស់ពីកម្លាំងកាយចិត្ត
និងភាគីពាក់ព័ន្ធទាំងអស់ ដែលបានដើរតួនាទីយ៉ាងសំខាន់ដល់ដំណើរការរីកចម្រើន
និងភាពជោគជ័យអាជីវកម្មរបស់យើងខ្ញុំ។
អស់រយៈពេល៣០ឆ្នាំនៃការបម្រើសេវាកម្មហិរញ្ញវត្ថុនៅក្នុងប្រទេសកម្ពុជា
រហូតដល់ពេលបច្ចុប្បន្ន ធនាគារ ហត្ថា បានវិវត្តខ្លួនឥតឈប់ឈរ ហើយបច្ចុប្បន្ននេះ
ធនាគារ ហត្ថា ក្លាយជាក្រុមហ៊ុនបុត្រសម្ព័ន្ធនៃធនាគារ ក្រុងស្រ៊ី ដែលជាធនាគារពាណិជ្ជធំជាងគេលំដាប់ទី៥ នៅក្នុងព្រះរាជាណាចក្រថៃឡង់ដ៍ ហើយធនាគារ ក្រុងស្រ៊ី ក៏ជាសមាជិកយុទ្ធសាស្ត្រនៃសម្ព័ន្ធហិរញ្ញវត្ថុអន្តរជាតិ
MUFG Financial Group ដែលជាសម្ព័ន្ធហិរញ្ញវត្ថុធំជាងគេនៅក្នុងប្រទេសជប៉ុន
និងធំបំផុតមួយនៅក្នុងពិភពលោក។ ជាមួយនឹងការគាំទ្រយ៉ាងពេញទំហឹងពីសំណាក់អាណាព្យាបាលរបស់ធនាគារ
ហត្ថា នេះ ធនាគារ ហត្ថា ធានាបាននូវដើមទុនគ្រប់គ្រាន់ក្នុងការបន្តប្រតិបត្តិការអាជីវកម្មរបស់ខ្លួន។
បន្ថែមលើនេះទៀត ធនាគារ ហត្ថា
ប្តេជ្ញាចិត្តខ្ពស់ក្នុងការផ្តល់នូវដំណោះស្រាយហិរញ្ញវត្ថុនវានុវត្តភាព ដើម្បីឆ្លើយតបទៅនឹងតម្រូវការរបស់អតិថិជនរបស់យើង។
ជាក់ស្តែង ផលិតផលហិរញ្ញវត្ថុដែលទើបដាក់ឱ្យប្រើប្រាស់នៅលើទីផ្សារថ្មីៗនេះ
ដូចជាប័ណ្ណវីសាហត្ថា និងហត្ថាម៉ូបាលជំនាន់ទី៣ បានបង្ហាញអំពីការប្តេជ្ញាចិត្តរបស់យើងឆ្ពោះទៅរកជម្រើសបង់ប្រាក់ប្រកបដោយសុវត្ថិភាព
និងងាយស្រួល។ ធនាគារយើងខ្ញុំយល់ច្បាស់អំពីគោលបំណង និងការចង់បានផ្នែកហិរវត្ថុរបស់អតិថិជនរបស់យើង
ដូច្នេះយើងខ្ញុំបន្តខិតខំប្រឹងប្រែងផ្តល់នូវដំណោះស្រាយហិរញ្ញវត្ថុតាមរយៈផលិតផល
និងសេវាហិរញ្ញវត្ថុយ៉ាងទូលំទូលាយនៅតាមថ្នាលឌីជីថលទាំងអស់។ ការប្តេជ្ញាចិត្តដ៏ម៉ុតមាំរបស់យើងខ្ញុំគឺការផ្តល់នូវសិទ្ធិអំណាចឱ្យអតិថិជនរបស់យើងទាំងអស់ធ្វើការសម្រេចចិត្តផ្នែកហិរញ្ញវត្ថុដ៏ត្រឹមត្រូវ។
នៅចំពោះមុខ ធនាគារ ហត្ថា
មានសុទិដ្ឋិនិយមអំពីការវិវត្តសកម្មភាពម៉ាក្រូសេដ្ឋកិច្ចនៃប្រទេសកម្ពុជា ដោយយោងលើទស្សនវិស័យសេដ្ឋកិច្ចដែលមានការរីកចម្រើនជាវិជ្ជមាន។
ធនាគារ កំណត់អាទិភាពក្នុងការរក្សាស្ថិរភាពនូវសំពៀតទ្រព្យសកម្ម និងពង្រឹងការគ្រប់គ្រងហានិភ័យតាមរយៈក្របខ័ណ្ឌដ៏រឹងមាំ
កិច្ចការត្រួតពិនិត្យដែលការកែលម្អ និងឧបករណ៍ត្រួតពិនិត្យទំនើបៗដទៃផ្សេងទៀត។ ធនាគារ
ក៏កំណត់នូវយុទ្ធសាស្ត្រក្នុងការដឹកនាំនាវាធនាគារ ហត្ថា ឆ្ពោះទៅរកភាពជោគជ័យ
នៅពេលខាងមុខ ដូចជាការជំរុញសកម្មភាពធនាគារ តាមរយៈនវានុវត្តឌីជីថល បង្កើតប្រភពចំណូលថ្មីៗ
ជំរុញឱ្យមានឧត្តមភាពប្រតិបត្តិការ និងបន្តសកម្មភាពផ្សព្វផ្សាយស្លាកយីហោ និងវប្បធម៌អាជីវកម្ម។
ជាថ្មីម្តងទៀត យើងខ្ញុំក៏សូមបង្ហាញនូវការដឹងគុណយ៉ាងស្មោះស្ម័គ្រសម្រាប់ការគាំទ្រឥតងាករេរបស់លោកអ្នក
មកលើធនាគារយើងខ្ញុំ។ យើងខ្ញុំនៅទីនេះរង់ចាំបម្រើសេវាកម្មជូនលោកអ្នកប្រកបដោយឧត្តមភាព
នៅពេលខាងមុខ។
រួមគ្នាសាងអនាគតដ៏ប្រសើរ!
លោក Wee
Mun Seng
ប្រធានអគ្គនាយកស្តីទី