សូមស្វាគមន៍មកកាន់
ធនាគារ ហត្ថា ម.ក!
ខ្ញុំមានសេចក្តីសោមនស្សរីករាយជាពន់ពេក
ដែលបានចូលរួមការងារជាមួយគ្រួសារធនាគារ ហត្ថា ក្នុងតួនាទីជាប្រធាននាយកប្រតិបត្តិថ្មី
ហើយខ្ញុំមានកិត្តិយសទទួលបានឱកាសក្នុងការដឹកនាំស្ថាប័នហិរញ្ញវត្ថុដែលមានការទទួលស្គាល់ទូលំទូលាយមួយនេះ ខណៈដែលយើងទាំងអស់គ្នាចាប់ផ្តើមទំព័រថ្មីនៃការរីកចម្រើននិងនវានុវត្តភាពដ៏គួរឱ្យចាប់អារម្មណ៍។
ធនាគារ ហត្ថា មានប្រវត្តិប្រកបដោយមោទនភាពក្នុងការបម្រើជូនប្រជាជនកម្ពុជាជាមួយនឹងសេវាហិរញ្ញវត្ថុដល់ដៃនិងផ្តល់ផលជាវិជ្ជមានដល់អតិថិជនទាំងអស់។
ជាមួយនឹងវត្តមានអស់រយៈពេល៣០ឆ្នាំនៅក្នុងប្រទេសកម្ពុជាកន្លងមកនេះ ធនាគារ ហត្ថា
ទទួលបាននូវការរីកចម្រើនគួរឱ្យកត់សម្គាល់។ នៅពេលបច្ចុប្បន្ន ធនាគារ ហត្ថា
គឺជាបុត្រសម្ព័ន្ធ ១០០% របស់ធនាគារ ក្រុងស្រ៊ី ដែលជាធនាគារលំដាប់ទី ៥ នៅក្នុងប្រទេសថៃ
ហើយក៏ជាសមាជិកយុទ្ធសាស្ត្រនៃសម្ព័ន្ធហិរញ្ញវត្ថុអន្តរជាតិ MUFG
Financial Group ដែលជាសម្ព័ន្ធហិរញ្ញវត្ថុធំជាងគេនៅក្នុងប្រទេសជប៉ុន។
ចំណុចនេះធានាថាធនាគារ ហត្ថា មានមូលធន និងធនធានគ្រប់គ្រាន់ក្នុងការបន្តប្រតិបត្តិការអាជីវកម្មរបស់ខ្លួន។
ក្នុងនាមជាប្រធានអគ្គនាយកថ្មី
ចក្ខុវិស័យរបស់ខ្ញុំគឺការពង្រីកបន្ថែមនូវមូលដ្ឋានគ្រឹះដ៏រឹងមាំនេះ
និងដឹកនាំនាវាធនាគារ ហត្ថា ឆ្ពោះទៅកាន់វឌ្ឍនភាពថ្មីមួយទៀត។ តាមរយៈគំនិតផ្តួចផ្តើមជាយុទ្ធសាស្ត្រ
ការរីកចម្រើននៃបច្ចេកវិទ្យា និងការផ្តោតជាពិសេសទៅលើតម្រូវការអតិថិជន
យើងនឹងបន្តនាំធនាគារ ហត្ថា ក្លាយជាដៃគូដ៏គួរឱ្យទុកចិត្តសម្រាប់អតិថិជនជារូបវន្តបុគ្គល
និងអាជីវកម្មនៅទូទាំងប្រទេស។
សូមជម្រាបជូនអតិថិជនដ៏មានតម្លៃរបស់យើងថា
អ្វីគ្រប់យ៉ាងដែលយើងធ្វើគឺតែងតែគិតគូរដល់ឧត្តមប្រយោជន៍លោកអ្នកជាអាទិភាព។ សុខុមាលភាពហិរញ្ញវត្ថុ
និងភាពជោគជ័យរបស់លោកអ្នក គឺជាកម្លាំងចលករនៅពីក្រោយបេសកកម្មរបស់យើង។ យើងនឹងបំពេញការងារដោយមិនខ្លាចនឿយហត់ដើម្បីបំពេញតាមអំពីតម្រូវការជាក់លាក់
និងផ្តល់នូវដំណោះស្រាយដ៏ត្រឹមត្រូវដែលនឹងជួយឱ្យលោកអ្នកសម្រេចបាននូវក្តីស្រមៃរបស់អ្នក។
ជូនចំពោះភាគទុនិកនិងភាគីពាក់ព័ន្ធទាំងអស់
ខ្ញុំប្តេជ្ញាចិត្តក្នុងការដឹកនាំ
និងផ្តល់នូវចក្ខុវិស័យជាយុទ្ធសាស្ត្រប្រកបដោយភាពហ្មត់ចត់ និងប្រុងប្រយ័ត្ន។ ជាមួយនឹងការបន្តផ្តល់នូវទំនុកចិត្ត
និងការគាំទ្ររបស់លោកអ្នក យើងនឹងបើកទំព័រថ្មីនៃការរីកចម្រើនទៅមុខជាមួយគ្នា
ពង្រីកដែនប្រតិបត្តិការ និងពង្រឹងប្រតិបត្តិការរបស់ធនាគារ ហត្ថា
ជាស្ថាប័នដែលមានស្ថិរភាព និងវិបុលភាពផ្នែកហិរញ្ញវត្ថុនៅក្នុងប្រទេសកម្ពុជា។
ជាការចាប់ផ្តើមនៃមាគ៌ាថ្មីរបស់ខ្ញុំ
ខ្ញុំមានសេចក្តីរំភើបរីករាយ និងមានគោលដៅរួមជាមួយគ្នា។ ខ្ញុំមានជំនឿយ៉ាងម៉ុតមាំថា
តាមរយៈការធ្វើការងារជាមួយគ្នា យើងនឹងអាចបង្កើតទំព័របន្ទាប់នៃដំណើរអាជីវកម្មដ៏គួរឱ្យចាប់អារម្មណ៍របស់ធនាគារ
ហត្ថា នោះគឺការឆ្ពោះទៅរកឧត្តមភាពសេវាកម្ម នវានុវត្តភាព
និងភាពជោគជ័យសម្រាប់យើងទាំងអស់គ្នា។
សូមអរគុណ និងរួមគ្នាបង្កើតប្រវត្តិសាស្ត្រទាំងអស់គ្នា!
រួមគ្នាសាងអនាគតដ៏ប្រសើរ!
លោក មិន សុផា
ប្រធាននាយកប្រតិបត្តិ
