ក្រុងពោធិ៍សាត់ ថ្ងៃព្រហស្បតិ៍ ទី១៦ ខែកុម្ភៈ
ឆ្នាំ២០២៣៖ ធនាគារ ហត្ថា បានប្រារព្ធពិធីប្រគល់រង្វាន់ជូនដល់សិស្សនិទ្ទេស
A B និង C នៃវិទ្យាល័យពោធិ៍សាត់ ដែលទើបប្រឡងជាប់សញ្ញាបត្រមធ្យមសិក្សាទុតិយភូមិសរុបចំនួន៦៥នាក់
ដែលប្រព្រឹត្តិទៅនៅក្នុងបរិវេណនៃវិទ្យាល័យពោធិ៍សាត់ នៃខេត្តពោធិ៍សាត់។
ក្នុងកម្មវិធីនេះមានការអញ្ជើញចូលរួមជាអធិបតីភាពដ៏ខ្ពង់ខ្ពស់ពីសំណាក់ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់
រួមទាំងគណៈប្រតិភូអមដំណើរ លោកឧកញ៉ា ហួត អៀងតុង ប្រធានអគ្គនាយក ធនាគារ ហត្ថា
រួមទាំងគណៈគ្រប់គ្រង និងបុគ្គលិក ធនាគារ ហត្ថា ព្រមទាំងលោកនាយក លោកគ្រូ អ្នកគ្រូ
ប្អូនៗសិស្សានុសិស្ស និងអ្នកសារព័ត៌មាន សរុប ប្រមាណជិត ៥០០នាក់។
ធនាគារ ហត្ថា បានរៀបចំរង្វាន់ដើម្បីលើកទឹកចិត្តប្អូនៗសិស្សថ្នាក់ទី១២
នៃវិទ្យាល័យពោធិ៍សាត់ចំពោះការខិតខំប្រឹងប្រែងសិក្សារហូតទទួលបានលទ្ធផលល្អក្នុងការប្រឡងសញ្ញាបត្រមធ្យមសិក្សាទុតិយភូមិនាពេលថ្មីៗនេះ
ក្នុងនោះរួមមានសិស្សនិទ្ទេស A ចំនួន ៧នាក់ ម្នាក់ៗទទួលបាន កុំព្យូទ័រយួរដៃចំនួន១គ្រឿង
ព្រមទាំងថវិកា ១លានរៀល។ សិស្សនិទ្ទេស B ចំនួន ១៤នាក់ ម្នាក់ៗទទួលបានថវិកាចំនួន
១លានរៀល និងសិស្សនិទ្ទេស C ចំនួន ៤៤នាក់ ម្នាក់ៗទទួលបានថវិកាចំនួន
៤០ម៉ឺនរៀល។
ទន្ទឹមនឹងនេះ លោកគ្រូ អ្នកគ្រូ ប្រមាណជាងមួយរយនាក់ក៏ទទួលបានអំណោយជាថវិកា
ក្នុងម្នាក់ៗទទួលបាន ៥ម៉ឺនរៀល និងវត្ថុអនុស្សាវរីយ៍ពី ធនាគារ
ហត្ថា ផងដែរ។
លើសពីនេះ បង់អង្គុយចំនួន ២៥
ក៏ត្រូវបានប្រគល់ជូនដល់វិទ្យាល័យពោធិ៍សាត់ទុកសម្រាប់ការប្រើប្រាស់ បង់ចំនួន ៥
ប្រគល់ជូនការិយាល័យអប់រំ យុវជន និងកីទ្បាក្រុងពោធិ៍សាត់ និងបង់ចំនួន ៥ទៀត
ប្រគល់ជូនសាលាបឋមសិក្សាពោធិ៍សាត់ទុកសម្រាប់ប្រើប្រាស់ផងដែរ។
ក្នុងកម្មវិធីដ៏អធិកអធមនោះ
លោកឧកញ៉ា ហួត អៀងតុង ប្រធានអគ្គនាយក ធនាគារ ហត្ថា បានមានប្រសាសន៍ថា កម្មវិធីថ្ងៃនេះ
បង្ហាញយ៉ាងច្បាស់អំពីការយកចិត្តទុកដាក់របស់ ធនាគារ ហត្ថា ចំពោះវិស័យអប់រំក្នុងន័យកសាងធនធានមនុស្សនៅក្នុងប្រទេសកម្ពុជា
ឆ្ពោះទៅរកការបន្តអភិវឌ្ឍន៍ប្រទេសជាតិរបស់យើងឱ្យកាន់តែរីកចម្រើនទៅមុខឥតឈប់ឈរ។
បន្ថែមពីនោះ លោកបានបន្តថា តាមរយៈកម្មវិធី «ប្រគល់រង្វាន់របស់ ធនាគារ ហត្ថា ជូនដល់សិស្សវិទ្យាល័យពោធិ៍សាត់
ដែលទើបតែប្រឡងជាប់សញ្ញាបត្រមធ្យមសិក្សាទុតិយភូមិ និទ្ទេស A B និង C» នាថ្ងៃនេះ
គឺជាសារដ៏មានសារៈសំខាន់សម្រាប់សិស្សានុសិស្សជំនាន់ក្រោយព្យាយាមខិតខំប្រឹងប្រែងសិក្សា
ដើម្បីទទួលបានលទ្ធផលល្អក្នុងការប្រឡងសញ្ញាបត្រមធ្យមសិក្សាទុតិយភូមិរបស់ខ្លួន
ដើម្បីក្លាយជាបញ្ញាវន្តដ៏មានតម្លៃ និងប្រកបដោយសមត្ថភាពខ្ពស់ក្នុងការបន្តវេនកសាង
និងអភិវឌ្ឍន៍ប្រទេសជាតិរបស់យើងឱ្យថ្កុំថ្កើងជានិរន្តរ៍។
អំពី ធនាគារ ហត្ថា
ធនាគារ
ហត្ថា បានកម្លាយខ្លួនពី គ្រឹះស្ថានមីក្រូហិរញ្ញវត្ថុ ហត្ថា កសិករ លីមីតធីត
មកជាធនាគារពាណិជ្ជ ជាផ្លូវការ នៅខែសីហា ឆ្នាំ២០២០ បន្ទាប់ពីបានផ្តល់សេវាហិរញ្ញវត្ថុក្នុងប្រទេសកម្ពុជាជិត
៣០ឆ្នាំ។ គិតត្រឹមខែមករា ឆ្នាំ២០២៣ ធនាគារ ហត្ថា
មានការិយាល័យសាខាសរុបចំនួន ១៧៧ ម៉ាស៊ីនអេធីអឹមចំនួន ១៤៣ កន្លែង
មានអតិថិជន បើកគណនីសរុបជាង ៥០០.០០០
គណនី ជាមួយផលប័ត្រឥណទានសរុបជាង ១.៩ ពាន់លានដុល្លារអាមេរិក ប្រាក់បញ្ញើសន្សំសរុបជាង ១.២ ពាន់លានដុល្លារអាមេរិក អតិថិជនប្រើប្រាស់កាតអេធីអឹមរបស់
ធនាគារ ហត្ថា មានសរុបជាង
១០០.០០០
នាក់
និងអតិថិជនប្រើប្រាស់សេវា Hattha
Mobile មានសរុប ចំនួនជាង ១៤0.00០ នាក់។
ធនាគារ ហត្ថា ផ្តល់សេវាហិរញ្ញវត្ថុយ៉ាងច្រើនសម្បូរបែបដល់អតិថិជនដូចជា៖
សេវាឥណទាន សេវាប្រាក់បញ្ញើសន្សំ សេវាផ្ទេរប្រាក់ក្នុងស្រុក
សេវាផ្ទេរប្រាក់ឆ្លងធនាគារក្នុងស្រុក សេវាផ្ទេរប្រាក់ឆ្លងប្រទេស សេវាអេធីអឹម
សេវាធនាគារចល័ត សេវាបើកប្រាក់បៀវត្ស ព្រមទាំងជាភ្នាក់ងារណែនាំសេវាធានារ៉ាប់រង
និងសេវាហិរញ្ញវត្ថុជាច្រើនផ្សេងទៀត។ បច្ចុប្បន្ន ធនាគារ ហត្ថា គឺជាបុត្រសម្ព័ន្ធរបស់ ធនាគារ ក្រុងស្រ៊ី ដែលជាធនាគារពាណិជ្ជធំជាងគេលំដាប់ទី ៥ នៅព្រះរាជាណាចក្រថៃឡង់ន៍ និងជាសមាជិករបស់សម្ព័ន្ធហិរញ្ញវត្ថុអន្តរជាតិ
Mitsubishi UFJ Financial Group (MUFG) ដែលជាសម្ព័ន្ធធនាគារធំជាងគេបំផុត នៅប្រទេសជប៉ុន ព្រមទាំងជាសម្ព័ន្ធសេវាហិរញ្ញវត្ថុដ៏ធំមួយ ក្នុងចំណោមសម្ព័ន្ធហិរញ្ញវត្ថុធំជាងគេលើសកលលោក។