បុគ្គលិកធនាគារ ហត្ថា សាខាជុំវិញខេត្តសៀមរាប ស្ម័គ្រចិត្តបរិច្ចាគឈាម ក្រោមប្រធានបទ “បរិច្ចាគឈាម សង្រ្គោះជីវិត ពិតជួយសង្គមជាតិ”

សៀមរាប  ថ្ងៃសៅរ៍ ទី២៧ ខែសីហា ឆ្នាំ២០២២៖ បុគ្គលិករបស់ ធនាគារ ហត្ថា ប្រមាណជាង១៣៨នាក់ មកពី សាខានានាជុំវិញខេត្តសៀមរាប បានស្ម័គ្រចិត្តចូលរួមបរិច្ចាគឈាម ក្រោមប្រធានបទ “បរិច្ចាគឈាម សង្រ្គោះជីវិត ពិតជួយសង្គមជាតិ”។ កម្មវិធីនេះបានប្រព្រឹត្តិទៅនៅមជ្ឈមណ្ឌលជាតិផ្តល់ឈាមខេត្តសៀមរាប ដែលស្ថិតនៅក្នុងមន្ទីរពេទ្យបង្អែកខេត្តសៀមរាប ដោយមានការអញ្ជើញចូលរួមពីសំណាក់ លោកវេជ្ជបណ្ឌិត អ៊ាប ប៊ុនលឿន អនុប្រធានមន្ទីរសុខាភិបាល តំណាងដ៏ខ្ពង់ខ្ពស់ ឯកឧត្តមវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលនៃរដ្ឋបាលខេត្តសៀមរាប លោកវេជ្ជបណ្ឌិត ប៉ែន ផលគុណ ប្រធានមន្ទីរពេទ្យខេត្តសៀមរាប ព្រមទាំងសហការី និង លោកឈួន សុខា នាយកតំបន់ ខេត្តសៀមរាប ព្រមនាយកសាខា និងបុគ្គលិកនៃធនាគារ ហត្ថា សរុបប្រមាណជា ១៥០នាក់។

លោកឈួន សុខា នាយកតំបន់ធនាគារ ហត្ថា ខេត្តសៀមរាប បានមានប្រសាសន៍ថា “ការចូលរួមបរិច្ចាគឈាមរបស់ បុគ្គលិក ធនាគារ ហត្ថា ក្នុងកម្មវិធីថ្ងៃនេះគឺជាសកម្មភាពមនុស្សធម៌ដ៏មានសារៈសំខាន់មួយ ដែលពិតជាមានតម្លៃក្រៃលែងក្នុងការជួយសង្គ្រោះជីវិតមនុស្ស។ ការងារសង្គមនៅថ្ងៃនេះ  ជាសកម្មភាពមួយបន្ថែមទៀត ដែលបានបង្ហាញកាន់តែច្បាស់អំពីការយកចិត្តទុកដាក់ របស់ធនាគារ ហត្ថា ក្នុងការចូលរួមចំណែកលើកស្ទួយសុខមាលភាពសង្គមកម្ពុជាឱ្យកាន់តែប្រសើរឡើង។ សូមបញ្ជាក់ថា នាខែឧសភា ក្នុងឆ្នាំនេះ ដោយមានការសហការពីមជ្ឍមណ្ឌលជាតិផ្តល់ឈាមភ្នំពេញ ធនាគារ ហត្ថា បានប្រារព្ធកម្មវិធីបរិច្ចាគឈាម ម្តងរួមមកហើយនៅរាជធានីភ្នំពេញ ដែលមានបុគ្គលិកការិយាល័យកណ្តាល ធនាគារ ហត្ថា ស្ម័គ្រចិត្តបរិច្ចាគឈាមចំនួន ១0៨នាក់ និងទទួលបានឈាមចំនួន ៧៤ ប្លោក សម្រាប់គាំទ្រដល់មជ្ឍមណ្ឌលជាតិផ្តល់ឈាម។” លោកបន្តថា “ធនាគារ ហត្ថា គឺតែងតែចូលរួមយ៉ាងសកម្មក្នុងសកម្មភាពសង្គម ទាំងវិស័យសុខាភិបាល វិស័យអប់រំ និងការងារមនុស្សធម៌នានាជាច្រើនរួមមាន៖ សាងសង់អគារ និងឧបត្តម្ភគ្រែពេទ្យជូនមន្ទីរពេទ្យ សាងសង់អាគារសិក្សា ចូលរួមរៃអង្គាសថវិកាជូនមន្ទីរពេទ្យកុមារអង្គរ ផ្តល់សម្ភារសិក្សាជូនសិស្សសាលា ផ្តល់អណ្តូងទឹក បង្រៀនអតិថិជន និងសិស្សានុសិស្សអំពីចំណេះដឹងហរិញវត្ថុ ដាំដើមឈើ សម្អាតអនាម័យតាមដងផ្លូវ ជួសជុលផ្លូវ ឧបត្តម្ភប្រាក់ជូនធនាគារជាតិដើម្បីគាំទ្រការងារសង្គម ព្រមទាំងចូលរួមឧបត្តម្ភជាមួយរាជរដ្ឋាភិបាលដើម្បីទិញវ៉ាក់សាំងការពារជំងឺកូវីដ១៩ជាដើម។  ជាថ្មីម្តងទៀតតាមរយៈកម្មវិធី “បរិច្ចាគឈាម សង្គ្រោះជីវីត ពិតជួយសង្គមជាតិ” នាថ្ងៃនេះ គឺជាការចូលរួម បន្ថែមទៀតរបស់ ធនាគារ ហត្ថា ក្នុងការរួមចំណែកលើកស្ទួយ និងលើកកម្ពស់សុខមាលភាពសង្គម។”

ជាចុងក្រោយ លោកជឿជាក់ថា សកម្មភាពថ្ងៃនេះ នឹងក្លាយជាគំរូដ៏ល្អមួយ ក្នុងការផ្សព្វផ្សាយឱ្យកាន់តែទូលំទូលាយ អំពីអត្ថប្រយោជន៍នៃការបរិច្ចាគឈាម ព្រមទាំងលើកទឹកចិត្តទៅកាន់បុគ្គលិកផ្សេងទៀត ក៏ដូចជាសាធារណជននានា ឱ្យធ្វើការបរិច្ចាគឈាម ដោយស្ម័គ្រចិត្តបន្ថែមទៀត ដើម្បីចូលរួមផ្តល់ក្តីសង្ឈឹមដល់អ្នកជំងឺដែលត្រូវការឈាមជាចាំបាច់។