ធនាគារ ហត្ថា បានឧបត្ថម្ភគាំទ្រដល់មន្ទីរពេទ្យកុមារអង្គរ ក្នុងការរៀបចំកម្មវិធី ជិះកង់ដើម្បីបរិស្ថាន និងសុខភាពកុមារ

សៀមរាប ថ្ងៃអាទិត្យ ទី១៤ ខែសីហា ឆ្នាំ២០២២៖ ធនាគារ ហត្ថា បានឧបត្ថម្ភគាំទ្រដល់មន្ទីរពេទ្យកុមារអង្គរ ក្នុងការរៀបចំកម្មវិធី ជិះកង់ដើម្បីបរិស្ថាន និងសុខភាពកុមារ។

កម្មវិធីនេះគឺប្រារព្ធឡើងដើម្បីកៀរគរប្រមូលថវិកាសម្រាប់មន្ទីរពេទ្យបន្តបេសកកម្មរបស់ខ្លួនក្នុងការជួយសង្គ្រោះកុមារកម្ពុជារាប់រយនាក់ក្នុងមួយថ្ងៃៗដែលត្រូវការសេវាព្យាបាលប្រកបដោយការយកចិត្តទុកដាក់។

កម្មវិធីជិះកង់ដើម្បីបរិស្ថាន និងសុខភាពនេះក៏មានភ្ជាប់ជាមួយនូវការដាំដើមឈើ និងការចែកសម្ភារសិក្សាជូនសិស្សសាលាបឋមសិក្សានគរក្រៅផងដែរ ដោយមានការអញ្ជើញចូលរួមពីថ្នាក់គ្រប់គ្រងមន្ទីរពេទ្យកុមារអង្គរ បុគ្គលិកធនាគារ ហត្ថា មកពីសាខានានាជុំវិញខេត្តសៀមរាប និងអ្នកចូលរួមមកពីស្ថាប័នផ្សេងៗ ព្រមទាំងសាធារណជននានា សរុបប្រមាណជាង ៩០០នាក់។

ការឧបត្ថម្ភគាំទ្ររបស់ ធនាគារ ហត្ថា ក្នុងថ្ងៃនេះបានសរបញ្ជាក់យ៉ាងច្បាស់អំពីការចូលរួមយ៉ាងសកម្មក្នុងសកម្មភាពសង្គម តាមរយៈការចូលរួមចំណែកការពារ និងថែរក្សាបរិស្ថាន គឺការដាំកូនឈើ ការលើកម្ពស់សុខមាលភាពសង្គម ការបរិច្ចាគឈាម និងជាពិសេសគឺការគាំពារកុមារកម្ពុជាដែលកំពុងសម្រាកព្យាបាលក្នុងមន្ទីរពេទ្យកុមារអង្គរតែម្តង។ ជាក់ស្តែងណាស់ ក្នុងឆ្នាំនេះ ដោយមានការអនុញ្ញាត និងការសហការពីមន្ទីរពេទ្យកុមារអង្គរ ធនាគារ ហត្ថា ក៏បានបង្កើតកម្មវិធីសប្បុរសធម៌មួយគឺ ការចូលរួមរៃអង្គាសថវិកាពីបុគ្គលិករបស់ធនាគារ ហត្ថា ព្រមទាំងអតិថិជនរបស់យើង ក៏ដូចជាសាធារណជននានា ជូនដល់មន្ទីរពេទ្យកុមារអង្គរជារៀងរាល់ខែផងដែរ ក្នុងគោលបំណងចូលរួមចំណែកឱ្យមន្ទីរពេទ្យបន្តបេសកកម្មរបស់ខ្លួនក្នុងការផ្តល់សេវាពិនិត្យ និងព្យាបាលកុមារកម្ពុជារបស់យើង ដោយឥតគិតថ្លៃ។

ហើយធនាគារ ហត្ថា សង្ឃឹមយ៉ាងមុតមាំថា សកម្មភាពក្នុងថ្ងៃនេះ នឹងជាសារមួយជួយផ្សព្វផ្សាយដល់សាធារណជនឱ្យយល់ដឹងកាន់តែទូលំទូលាយ អំពីអត្ថប្រយោជន៍នៃបរិស្ថាន ក៏ដូចជាសុខភាពផ្ទាល់ខ្លួនតាមរយៈការជិះកង់កម្សាន្តផង ព្រមទាំងជាការហាត់ប្រាណដើម្បីសុខភាព និងបរិស្ថានយើងផង ហើយអ្វីដែលសំខាន់នោះ គឺការចូលរួមបរិច្ចាគថវិកាផ្ទាល់ខ្លួនរបស់យើងជូនមន្ទីរពេទ្យកុមារអង្គរ ដើម្បីឱ្យមន្ទីរពេទ្យបន្តបេសកកម្មមើលថែកុមារកម្ពុជារបស់យើងឱ្យទទួលបានការព្យាបាលដ៏ត្រឹមត្រូវ និងឥតគិតថ្លៃ៕

ទាញយកកម្មវិធីទូរសព្ទឥឡូវនេះ